Starfsfólk

Ánægja og vellíðan starfsfólks okkar eru undirstaða þeirrar góðu og gagnlegu þjónustu sem við viljum að sjóðfélagar og aðrir upplifi í samskiptum sínum við sjóðinn.

Við búum yfir einstökum mannauði, hæfu og reynslumiklu starfsfólki sem leggur sig allt fram í sínum störfum og er samvinna starfsfólks mjög mikilvæg innan og á milli allra deilda sjóðsins. Rík áhersla er lögð á að vinnustaðurinn okkar sé vel samkeppnisfær við aðra sambærilega vinnustaði og leggjum við áherslu á og stuðlum í sameiningu að góðu og fjölskylduvænu starfsumhverfi, vellíðan starfsfólks, fræðslu, þjálfun og jákvæðum starfsanda.

Upplýsingagjöf til starfsmanna skiptir miklu máli og mikilvægt að starfsfólk þekki það sem er að gerast í umhverfi sjóðsins og innan hans. Starfsmannafundir eru haldnir reglulega til upplýsinga og samtals. Uppbyggjandi og fræðandi fyrirlestrar eru reglulega í boði fyrir starfsfólk ásamt möguleika á símenntun sem sjóðurinn hefur fjárfest í og starfsfólk er hvatt til að nýta sér. Hlustað er á skoðanir starfsfólks og ánægjukannanir eru framkvæmdar reglulega og niðurstöður þeirra rýndar og ræddar í starfsmannahópnum. Áhersla er lögð á að viðhalda því sem vel er gert og eykur ánægju starfsmanna og einnig er leitað leiða til úrbóta ef upp á vantar.

Starfsmannafélag Birtu stuðlar að fjölbreyttu og öflugu félagslífi og skipuleggur viðburði fyrir starfsfólk og má þar nefna árshátíð, jólaveislu, óvissuferðir, gönguferðir og aðra viðburði til skemmtunar og samveru. Öllum starfsmönnum býðst aðild að starfsmannafélagi Birtu.

Lista yfir starfsfólk Birtu má finna á vef sjóðsins.

Á árinu 2025 var sérstök áhersla lögð á aukið aðgengi starfsfólks að símenntun og fræðslu og höldum við áfram á þeirri braut að auka sífellt við möguleika á fræðslu og að hvetja starfsfólk til að bæta við sig þekkingu. Stóraukið framboð aðgengilegra fyrirlestra gerði starfsfólki auðveldara fyrir að sækja sér aukna þekkingu og styrkja sig í starfi með ávinningi bæði fyrir starfsmanninn sjálfan sem og sjóðinn.

Birta leggur áherslu á að ráða til starfa hæft starfsfólk og allar ráðningar byggja á hæfni, menntun og starfsreynslu. Heildarstarfsmannavelta (e. total turnover) var 10,3 % á árinu 2025. Þrír starfsmenn létu af störfum á árinu og nýráðningar voru fjórar.

Einn starfsmaður hóf töku fæðingarorlofs á árinu 2025.

Við hjá Birtu leggjum ríka áherslu á vellíðan starfsfólks á vinnustað og hnökralaus og góð samskipti milli starfsmanna. Reglulega er boðið upp á fræðslu tengda samskiptum og vellíðan á vinnustað. Starfsmenn hafa gert sín á milli samskiptasáttmála sem er leiðarljós í samskiptum innan sjóðsins. Sáttmálinn var liður í því að gera góða vinnustaðamenningu enn betri. Í húsnæði sjóðsins má víða sjá leiðarljós sem minna okkur á mikilvægi þess að eiga góð samskipti við vinnufélaga sem og aðra.

Við leitumst við að auka heilbrigði starfsmanna okkar með því að skapa gott vinnuumhverfi og hvetjum við starfsfólk til að huga vel að heilsu og vellíðan bæði innan vinnustaðar sem utan og bjóðum upp á hollt og næringarríkt fæði í mötuneyti sjóðsins. Sjóðnum er annt um heilsu og öryggi starfsmanna sinna og vill mæta andlegum, félagslegum og líkamlegum þörfum þeirra á vinnustaðnum.

Við veitum fræðslu um þá þætti er stuðla að góðri heilsu og heilbrigðum lífsstíl og erum heilsueflandi lífeyrissjóður

Starfsfólk þurfti ekki að vera frá vinnu á árinu 2025 vegna slysa á vinnustað eða vegna atvinnutengdra sjúkdóma.

Sjóðnum er umhugað um að vinnuaðstaða starfsmanna sé fullnægjandi svo ekki skapist hætta á því að þeir þrói með sér starfstengda sjúkdóma. Einnig eru starfsmenn upplýstir um stöðu og beitingu líkamans við vinnu til að lágmarka líkur á því. Iðjuþjálfi/sjúkraþjálfi fer reglulega yfir starfsstöðvar starfsmanna og leiðbeinir þeim hvað varðar stillingar á stólum, borðum og öðrum þeim búnaði sem starfsmenn þurfa á að halda við störf sín. Niðurstöður sérfræðingsins eru svo notaðar til að bæta úr þar sem þörf er á.

Hugað er að andlegri líðan starfsfólks með stuðningi ef þörf er á, sveigjanleika, fræðslu og óheftu aðgengi að stjórnendum ef starfsmaður kýs að bera málefni sem upp koma undir þá.