Heildar skrifstofu- og stjórnunarkostnaður Birtu lífeyrissjóðs nam 1.130 milljónum króna á árinu 2025 en árið 2024 nam hann 1.013 milljónum króna.
Markvisst er dregið úr kostnaði þar sem hægt er til að hagræða í rekstri og áhersla lögð á kostnaðarárvekni alls starfsfólks.
Rekstrarkostnaður sem hlutfall af meðalstöðu hreinnar eignar til greiðslu lífeyris stóð í stað á milli ára og var 0,15% á árinu 2025 sem og á árinu 2024. Rekstrarkostnaður sem hlutfall af iðgjöldum var 4,35% á árinu 2025 en 4,01% árið áður. Frá stofnun Birtu lífeyrissjóðs í lok árs 2016 hefur hlutfall rekstrarkostnaðar af meðalstöðu hreinnar eignar til greiðslu lífeyris lækkað úr 0,22% í 0,15%. Sjóðurinn hefur gegnum árin lagt áherslu á og markvisst dregið úr kostnaði þar sem mögulegt er innan skynsamlegra marka og spilar hugarfar og samstarf starfsfólks þar stóran þátt.
Í skýringu 7 í ársreikningi má sjá sundurliðun á skrifstofu- og stjórnunarkostnaði sjóðsins.
meðalstaða eigna
Aðkeypt tölvuþjónusta árið 2025 nam 6.285 milljónum króna en var 5.372 milljónir króna árið á undan. Kostnaður við rekstur upplýsingakerfa nam 196.109 milljónum króna á árinu 2025 en var 160.098 milljónir króna árið 2024. Öryggi í rekstri upplýsingatækni er stór og ört stækkandi þáttur í rekstri sjóðsins. Sívaxandi ógnir við net- og gagnaöryggi í upplýsingatækniumhverfi kalla á það að brugðist sé við og varnir efldar. Sjóðurinn leggur þunga áherslu á upplýsingatækniöryggi og að mæta nýjum ógnum með auknum vörnum. Vel ígrundaðar fjárfestingar á sviði öryggisvarna eru því mikilvægar og eru ákvarðanir þar að lútandi teknar með árvekni og skynsemi að leiðarljósi. Starfsfólk sjóðsins fær reglulega þjálfun í að greina hættur og bregðast rétt við þeim, þegar ógn steðjar að.
Gjöld til umboðsmanns skuldara hækkuðu um 21,09% milli ára, eftirlitsgjöld til Fjármálaeftirlitsins hækkuðu um 21,41% á milli ára og greiðslur til Landssamtaka lífeyrissjóða hækkuðu um 22,42% frá árinu 2024.
Fjöldi stöðugilda á árinu var 29,9 og nam heildarfjárhæð launa 660 millj. kr., þar af voru launatengd gjöld 122 millj. kr. samanborið við 610 millj. kr. á árinu 2024 en þá voru launatengd gjöld 114 millj. kr.
Annar rekstrarkostnaður nam 126 milljónum króna á árinu 2025 samanborið við 144 milljónir króna árið 2024 og lækkaði því um 12,2%. Aukinn kostnaður var við veðbandayfirlit samfara auknum lánveitingum til sjóðfélaga auk þess hefur sjóðurinn aukið við áskriftir að mikilvægum gagnaveitum á sviði áhættu- og eignastýringar. Póstkostnaður lækkaði talsvert samhliða upptöku frekari rafrænna lausna í starfsemi sjóðsins. Aðkeypt vinna lækkar frá fyrra ári.
Kostnaðarárvekni verður áfram mikilvæg í rekstri sjóðsins og stöðugt er leitað leiða til að hagræða og draga úr kostnaði. Sjóðurinn stækkar með auknu álagi sem leitast er við að mæta með hámörkun framleiðni á hvert stöðugildi innan sjóðsins. Framleiðniaukinn sem byggður er á þróun framleiðni innan starfseminnar er drifinn áfram með einföldun vinnuferla, nýjum tæknilausnum og sjálfvirkni sem svo skilar sér í hagkvæmari rekstri.